马，朝人家门前头一立，吓得煞人，所以，随便啥人见到伊，有理也要让三份，无理更加绕道走，没啥人敢当出头鸟，当面叫伊“白相人嫂嫂”的诨号，更不愿跟伊正面顶撞。
宁波女人就养成了得理不饶人的腔调。再加上宁波女人本来就欢喜管闲事，老法头里有一种讲法，叫“没卵保长”，欢喜管闲事，是个百有份。辰光一长，弄成了一清早就坐了弄堂口的木土房子门口头，一边纳纳鞋底，捡捡小菜，一边样样事体管管，像个戴红袖章的纠察。小囡要跑出弄堂，想到马路上去白相一歇，伊要管，哇啦一声：“小驹头，回来。马路上有车子。”眉毛竖起来，眼乌珠瞪成了牛卵子，再犟头倔脑的小囡也只好吃瘪，乖乖地回到弄堂里来了。看到小姑娘到弄堂口粪便池倒痰盂，伊也要讲：“听到伐，痰盂伸进去一点，不要倒得外头一塌糊涂。”眼睛盯牢子看，像监管一个贼一样，离也不离开。小姑娘就老老实实地把痰盂伸到粪便池里厢，倒得清清爽爽，滴水不漏。假使有陌生人进弄堂，宁波女人板钉要问一声：“寻啥人？”一口宁波腔的闲话，响得整条弄堂统统能听到。假使是坏人肯定别转身体就要跑了。有人讲宁波女人就像弄堂的一把锁，锁牢了弄堂里的安全，也有人讲：宁波女人像弄堂里的蛮娘，一弄堂的人统统成了伊的“拖油瓶“，“出气筒”。
这章没有结束，请点击下一页继续阅读！